2020 წელს სასმელი წყლის სისტემის მოწყობა სოფელ არაშენდაშიც იგეგმება, - ამის შესახებ „ინტერპრესნიუსს“ გორის მუნიციპალიტეტის მერიიდან აცნობეს.
მათივე ინფორმაციით, პროექტით გათვალისწინებული სამუშაოების შესყიდვის მიზნით ტენდერი მიმდინარეობს.
სამუშაოების სატენდერო ღირებულება 522 731 ლარია. წინადადებების მიღება 30 იანვარს სრულდება.
პროექტის ფარგლებში მოეწყობა წყალმომარაგების შიდა გამანაწილებელი ქსელი, ჭაბურღილი, საქლორატოროსა და სადაწნეო სარეგულაციო რეზერვუარი.
ამასთან, როგორც ინფორმაციაშია აღნიშნული, სოფელში ამ დროისთვის წყალმომარაგების სისტემა საერთოდ არ არსებობს. ათეული წლებია ადგილობრივები წყალს რამდენიმე კილომეტრიდან ეზიდებიან. სამუშაოების დასრულების შემდეგ 224 ოჯახს წყლის პრობლემა აღარ შეაწუხებს.