მექსიკის უსაფრთხოების ძალებმა მიგრანტების წინააღმდეგ, რომლებიც ცენტრალური ამერიკიდან მდინარის გადალახვასა და მექსიკაში შესვლას ცდილობდნენ, ცრემლსადენი გაზი გამოიყენეს, -ამის შესახებ ინფორმაციას „როიტერსი“ ავრცელებს.
სააგენტოს ცნობით, რამდენიმე ქალი აცხადებს, რომ შექმნილი ქაოსის შედეგად საკუთარი მცირეწლოვანი შვილის პოვნას ვეღარ ახერხებს, თუმცა მიგრაციის ეროვნული ინსტიტუტი ბავშვების დაკარგვის შესახებ ინფორმაციას უარყოფს.
მექსიკის მიგრაციის ეროვნული ინსტიტუტის ინფორმაციით, მიგრანტებმა პოლიციას ქვები დაუშინეს, რის შედეგადაც დაშავებულია ნაციონალური გვარდიის ხუთი წევრი.
მიგრაციის ეროვნული ინსტიტუტი აცხადებს,რომ დაკავებულია 402 მიგრანტი, რომლებიც იმიგრაციის ცენტრებში არიან გადაყვანილები, სადაც ისინი საკვებს, წყალსა და თავშესაფარს მიიღებენ. იმ შემთხვევაში, თუ მათთვის სამართლებრივი სტატუსის მინიჭების საკითხი ვერ მოგვარდება, დაკავებულებს თვითმფრინავისა და ავტობუსების საშუალებით თავიანთ სახლებში დააბრუნებენ.
შეგახსენებთ, გასულ წელს აშშ-ის პრეზიდენტი დონალდ ტრამპი მექსიკას ტარიფების დაწესებით დაემუქრა იმ შემთხვევაში, თუ ქვეყანა მიგრანტების ნაკადს არ შეამცირებს, რომლებიც აშშ-ში მექსიკის გავლით ჩადიან.