ნატო-საქართველოს კომისიის ფარგლებში გამართულ შეხვედრაზე შერიგებისა და სამოქალაქო თანასწორობის საკითხებში სახელმწიფო მინისტრი ქეთევან ციხელაშვილი საქართველოს ოკუპირებულ ტერიტორიებზე არსებულ ვითარებაზე და ე.წ. ბორდერიზაციის პროცესზე ისაუბრებს. როგორც მან აღნიშნა, ნატო-საქართველოს კომისიის სხდომის გამართვამდე ნატო-ს გენერალური მდივნის მოადგილეს შეხვდებიან.

„ნატო-საქართველოს კომისიის ფარგლებში, შესაძლებლობა გვექნება ვისაუბროთ საქართველოს ოკუპირებულ ტერიტორიებზე არსებულ მდგომარეობაზე, მიმდინარე გამოწვევებზე. ეს ძალიან მნიშვნელოვანი ფორმატია, რომელიც შესაძლებლობას იძლევა, რომ ბევრი დეტალი განვიხილოთ. ეს გახლავთ ჩვენი პარტნიორების მუდმივი წარმომადგენლობები ნატო-ში და რა თქმა უნდა, ამოცანა გახლავთ ის, რომ ჩვენ გვქონდეს როგორც ნატო-ს, ისე მისი წევრი თითოეული სახელმწიფოს მხარდაჭერა ყოველდღიურ მშვიდობიან ძალისხმევაში და ბრძოლაში ჩვენი ტერიტორიული მთალიანობისთვის, ჩვენი მოსახლეობის უფლებების დაცვისთვის, ჩვენი ქვეყნის დეოკუპაციისთვის.

ამ ფორმატში ადრეც გვქონდა შესაძლებლობა, რომ მოხსენება გაგვეკეთებინა, ფაქტობრივად ვისაუბრებ უკვე სიახლეებზე და იმ სამწუხარო, ძალიან სავალალო განვითარებებზე, რომელსაც ადგილი აქვს საქართველოს ორივე ოკუპირებულ ტერიტორიაზე, განგრძობით მავთულხლართების მშენებლობაზე, ჩორჩანას მიმდებარე ტერიტორიაზე არსებულ დაძაბულობასა და სხვა სადამსჯელო ზომებზე, მაგალითად, როგორიც ახალგორის მიმართულებით გადასასვლელის დაკეტვაა, რაზეც მე ევროპარლამენტშიც ღიად ვისაუბრე თითოეული ახალგორელის სახელით“, - განაცხადა ქეთევან ციხელაშვილმა.