2020 წელს საინფორმაციო სააგენტო "ინტერპრესნიუსს" დაარსებიდან 20 წელი შეუსრულდა. 23 იანვარს, 19:00 საათზე, სასტუმრო „თბილისი მარიოტში“ „ინტერპრესნიუსი“ საიუბილეო თარიღთან დაკავშირებით ღონისძიებას გამართავს, სადაც სააგენტოს მიერ გავლილი 20 წელი შეჯამდება.

ღონისძიებაზე ასევე წარმოდგენილი იქნება ფოტომასალა სააგენტოს არქივიდან, რომელიც 20 წლის განმავლობაში საქართველოში მიმდინარე მოვლენებს ასახავს და გადაღებულია ქვეყნის წამყვანი ფოტორეპორტიორების მიერ.

ღონისძიებას დაესწრებიან ქართველი პოლიტიკოსები, სასამართლო სისტემის, სამოქალაქო საზოგადოების, ბიზნესის, საქართველოში აკრედიტებული დიპლომატიური კორპუსის, კულტურის სფეროს და მედიის წარმომადგენლები.

საინფორმაციო სააგენტო „ინტერპრესნიუსი“ 2000 წლის იანვარში დაფუძნდა, 2005 წლიდან კი "პალიტრა მედიას" შემადგენლობაშია. ვებგვერდი IPN.GE მკითხველს სთავაზობს ამომწურავ და მიუკერძოებელ ინფორმაციას საქართველოში და მის ფარგლებს გარეთ განვითარებულ მოვლენებზე.

სააგენტოს გუნდის მთავარი პრინციპებია: სიზუსტე, ოპერატიულობა, დაბალანსებული და ობიექტური ინფორმაციის მიწოდება. სააგენტოს ვებ-გვერდს ყოველდღიურად საშუალოდ 70 ათასამდე უნიკალური მნახველი ჰყავს.

ამ წლების განმავლობაში სააგენტომ მკითხველისა და მედიამაუწყებლობების დიდი ნდობა მოიპოვა და ქართულ მედიასივრცეში ერთ-ერთი ლიდერის პოზიციას ინარჩუნებს.