ირანელი, რომელმაც თვითმფრინავი ჩამოაგდო, დაკავებულია, - ამის შესახებ ქვეყნის საგარეო საქმეთა მინისტრმა, მუჰამედ ზარიფმა „შპიგელთან“ ინტერვიუში განაცხადა.

„ეს რთული სიტუაცია იყო რთულ დროში. სხვებს ბევრად მეტი დრო დასჭირდათ. თითქმის 32 წლის წინ, აშშ-მა ირანული სამგზავრო თვითმფრინავი ჩამოადგო და დღემდე ოფიციალურად ბოდიში არ მოუხდიათ. ის ამერიკელი, რომელიც ამ ფაქტზე პასუხისმგებელი იყო მედლითაც კი დააჯილდოეს. ის ირანელი, ვინც უკრაინული თვითმფრინავი ჩამოაგდო, დაკავებულია“, - განაცხადა ზარიფმა.

შეგახსენებთ, რომ თეირანთან ახლოს „უკრაინის საერთაშორისო ავიახაზების“ კუთვნილი თვითმფრინავი 8 იანვარს ჩამოვარდა, რასაც 176 მგზავრის სიცოცხლე ემსხვერპლა. „ბოინგის“ ჩამოგდებაზე პასუხისმგებლობა ირანის რევოლუციურმა გვარდიამ 11 იანვარს აიღო. მათ აღიარეს, რომ უკრაინული სამგზავრო თვითმფრინავის კატასტროფის მიზეზი „ადამიანური გადაცდომა“ გახდა.