ბალტიისპირეთის ქვეყნები ევროპის საბჭოს საპარლამენტო ასამბლეის დღევანდელ სესიაზე კიდევ ერთხელ დააყენებენ საკითხს, რომ რუსეთის დელეგაციას ორგანიზაციაში ხმის მიცემის უფლება შეუჩერდეს.

როგორც ჟურნალისტებს საქართველოს პარლამენტის უმრავლესობის წევრმა და ქართული დელეგაციის ხელმძღვანელმა ირაკლი კობახიძემ განუცხადა, საკითხს ქართული დელეგაციის ყველა წევრი - როგორც უმრავლესობის, ისე ოპოზიციის წარმომადგენელი მხარს დაუჭერს.

„გუშინ და დღეს დილით ჩვენ გვქონდა აქტიური კონსულტაციები კოლეგებთან ბალტიისპირეთის ქვეყნებიდან, უკრაინის დელეგაციის წარმომადგენლებთან. ჩვენი გეგმაა ის, რომ კითხვის ნიშნის ქვეშ დავაყენოთ რუსული დელეგაციის აღიარების საკითხი. ამასთან დაკავშირებით საკითხი დღეს გამოდის პლენარულ სესიაზე და ჩვენ ყველა მხარს დავუჭერთ ამ საკითხს. ჩვენთვის მნიშვნელოვანია, დაიწყოს პროცედურა ამ საკითხის გადასახედად და იმედი გვაქვს, საბოლოო ჯამში, ინიციატივა წარმატებული იქნება. ეს ბევრ რამეზეა დამოკიდებული, თუმცა რაც მთავარია, ეს პროცედურა უნდა დაიწყოს“, - აღნიშნა კობახიძემ.

კითხვაზე, რა ძირითადი გზავნილები გაჟღერდება ქართული მხარის მიერ, კობახიძე შემდეგნაირად პასუხობს:

„ჩვენ ამ ფორმატს, ამ ტრიბუნას მაქსიმალურად გამოვიყენებთ, რომ ჩვენი ეროვნული ინტერესები, რაც დაკავშირებულია პირველ რიგში ოკუპაციის, სუვერენიტეტის და ტერიტორიული მთლიანობის საკითხთან, გავატაროთ. შესაბამისი გზავნილები მივაწოდოთ ჩვენს კოლეგებს და მეგობრებს. ასევე, ჩვენს მეგობრებთან და კოლეგებთან საუბარი გვექნება საქართველოში მიმდინარე პროცესებზე“, - აღნიშნა კობახიძემ.

ცნობისთვის, საქართველოს პარლამენტის მუდმივმოქმედი დელეგაცია სტრასბურგში, ევროპის საბჭოს საპარლამენტო ასამბლეის სესიაში მონაწილეობს. საპარლამენტო დელეგაციას ირაკლი კობახიძე ხელმძღვანელობს.

ამასთან, როგორც ცნობილია, ყოველ წელს, ზამთრის სესიის გახსნისას ხდება ევროპის საბჭოს დელეგაციების უფლებამოსილების ცნობა. რუსეთის დელეგაციას ორგანიზაციაში ხმის მიცემის უფლება შეჩერებული ჰქონდა, თუმცა ბოლოს დაუბრუნდა.

იხილეთ ვიდეო: ევროსაბჭოს დღევანდელ სესიაზე რუსეთის დელეგაციისთვის ხმის მიცემის შეჩერების საკითხს დააყენებენ