გორში მომხდარი ავტოსაგზაო შემთხვევის შედეგად დაშავებული ახალგაზრდა მამაკაცის მდგომარეობა, რომელიც სამხედრო ჰოსპიტალშია მოთავსებული, მძიმეა.

თავდაცვის სამინისტროს გორის სამხედრო ჰოსპიტალში აცხადებენ, რომ ახალგაზრდას, რომელსაც ქალა-ტვინის მძიმე ხარისხის ტრავმა აქვს მიღებული, უტარდება კვლევები და მიმდინარეობს შესაბამისი გადაუდებელი ღონისძიებები, გამოძახებულია ნეიროქირურგი.

ავარიისას მსუბუქად დაშავებული კიდევ ერთი პირი, 16 წლის მოზარდი, კლინიკა ,,გორმედშია“ გადაყვანილი, ექიმების განცხადებით, მისი ჯანმრთელობის მდგომარეობა სტაბილურია.

ავტოსაგზაო შემთხვევა გორის გასასვლელში მოხდა. კომბინატის დასახლების ტერიტორიაზე, სოფელ ტინისხიდთან ახლოს ერთმანეთს ორი მსუბუქი ავტომანქანა შეეჯახა. ავარიის შედეგად შემთხვევის ადგილზე გარდაიცვალა 16 წლის ბიჭი. მომხდარ ფაქტზე გამოძიება სსკ-ის 276-ე მუხლის მეორე ნაწილით მიმდინარეობს.