ფოთში მოვაჭრეები თევზის ბაზრობის გაუქმებას აპროტესტებენ. მათ გადაკეტილი აქვთ მეგრელიშვილის სანაპიროზე საავტომობილო გზა. ადგილობრივი ხელისუფლების გადაწყვეტილებით, აღნიშნულ ტერიტორიაზე თევზის რეალიზაციისთვის არსებული სავაჭრო კონსტრუქციის დემონტაჟი უნდა განხორციელდეს, რადგან იგი არ შეესაბამება მოქმედი კანონმდებლობის მოთხოვნებს.

მოვაჭრეები აცხადებენ, რომ წლების მანძილზე ისინი თევზის რეალიზაციას სხვა ადგილზე ახორციელებდნენ, რიონის სანაპიროზე კი მერიის გადაწყვეტილებით სამი წლის წინ გადმოიყვანეს. მათთვის გაუგებარია რატომ არ გაითვალისწინა მაშინ ხელისუფლებამ ის გარემოება, რომ აღნიშნულ ტერიტორიაზე სავაჭრო ობიექტების განთავსება კანონდარღვევა იყო და რატომ გაახსენდა მერიას ეს დღეს.

მოვაჭრეებს ხელისუფლება ალტერნატიულ ფართს სთავაზობს, რაც მათთვის მიუღებელია.

„მერიის დადგენილებაა თევზის ბაზრობის დახურვის შესახებ. თავის დროზე ბაზრის დირექტორს მისცეს უფლება, რომ ბაზრობა გაეხსნა, მან მოგვიწყო და კარგად ვიყავით. მაცივრების გარეშე არ ვმუშაობთ, ყველანაირი პირობები გვაქვს, წყალი, შუქი, მაგრამ დადგენილება მოვიდა მერიიდან ბაზრის დახურვის შესახებ. შემოგვთავაზეს ალტერნატიული ფართი მაგრამ, 36 კვადრატში ფიზიკურად 7 ადამიანი თავისი მაცივრებით, ვერ დაეტევა. ვიდრე ჩვენი მოთხოვნა არ დაკმაყოფილდება, არ გავხსნით გზას. ბანკის ყოველდღიური გადასახადი გვაქვს“, - განაცხადა თევზის რეალიზატორმა ლალი ქორჩილავამ.

ადგილზე მობილიზებულია პოლიცია.