ფოთში, მოვაჭრეებს, რომლებიც თევზის ბაზრობის გაუქმებას აპროტესტებენ, მერიის არქიტექტურისა და ადმინისტრაციული ზედამხედველობის სამსახურში გამოეხმაურნენ. როგორც აღნიშნულ სამსახურში აცხადებენ , ხელისუფლების წარმომადგენლები გუშინ შეხვდნენ თევზის რეალიზატორებს და შეთანხმება შედგა, რომ ისინი დატოვებდნენ ობიექტს, სადაც ვაჭრობას ახორციელებდნენ და ალტერნატიულ ფართში განთავსდებოდნენ.

„ჩვენ ნაპირდაცვის სამსახურის მიერ ვართ გაფრთხილებული, რომ ეს ტერიტორია გავანთავისუფლოთ. გუშინ შედგა შეთანხმება თევზით მოვაჭრეებსა და მუნიციპალიტეტს შორის, რომელსაც ესწრებოდა მერის პირველი მოადგილე. შევურჩიეთ ორი ვარიანტი, ერთი შ.პ.ს „ლუკას“და მეორე შ.პ.ს. „კოლხა 97“- ის ტერიტორიაზე, მოილაპარაკეს იჯარის თანხაზე „კოლხასთან“ და დღეს რა მოხდა არ ვიცით. ამიტომ მუნიციპალიტეტი მუშაობს ამ თემაზე, რატომ დაირღვა ეს შეთანხმება, ჯერჯერობით არ ვიცით. რა თქმა უნდა, კანონის ფარგლებში შევეცდებით მივაღწიოთ შეთანხმებას“, - განაცხადა არქიტექტურისა და ადმინისტრაციული ზედამხედველობის სამსახურის უფროსმა თენგიზ შონიამ.