კრემლში, უკრაინის პრეზიდენტი, ვლადიმირ ზელენსკი მეორე მსოფლიო ომთან დაკავშირებული განცხადებების გამო გააკრიტიკეს.

როგორც რუსეთის პრეზიდენტის პრესმდივანმა, დიმიტრი პესკოვმა განაცხადა, უკრაინა ზურგს უმაგრებს პოლონეთის „ძალიან მცდარ“ პოზიციას.

„ჩვენ კატეგორიულად არ ვეთანხმებით ამ განცხადებას. ჩვენ მიგვაჩნია, რომ ის მცდარია და შეურაცხყოფს ჩვენი ბაბუების ხსოვნას“,-განაცხადა პესკოვმა.

ცნობისთვის, უკრაინის ლიდერმა პოლონეთის პრეზიდენტ, ანდჟეი დუდასთან ერთად გამართულ ერთოვლივ პრესკონფერეციაზე მეორე მსოფლიო ომში რუსეთის როლზე ისაუბრა.

„პოლონეთმა პირველად განიცადა ტოტალიტარული რეჟიმების კრიმინალური დაპირისპირების შედეგები. ამან მეორე მსოფლიო ომამდე მიგვიყვანა და საშუალება მისცა ნაცისტებს, სასიკვდილო ჰოლოკოსტის მანქანა აემოქმედებინათ“,-განაცხადა ზელენსკიმ.

შეგახსენებთ, პოლონეთსა და რუსეთს შორის დაპირისპირება მეორე მსოფლიო ომის საკითხთან დაკავშირებით გასულ თვეს დაიწყო, როცა ვლადიმერ პუტინმა პოლონეთი ჰიტლერის რეჟიმთან თანამშრომლობაში დაადანაშაულა და პოლონეთის ელჩს ნაცისტურ გემანიაში „ანტისემიტი ღორი“ უწოდა. მოგვიანებით კომენტარები გაკეთდა ვარშავაშიც, სადაც ქვეყნის ლიდერებმა ვლადიმერ პუტინი ისტორიის გადაწერის მცდელობაში დაადანაშაულეს.