ბათუმში, ჩინეთის ორი მოქალაქე ექიმების მეთვალყურეობის ქვეშ იმყოფება. როგორც აჭარის ჯანდაცვის მინისტრის მოადგილე ნინო ნიჟარაძემ ჟურნალისტებს განუცხადა, ჩინეთის მოქალაქეების ჯანმრთელობის მდგომარეობა აბსოლუტურად დამაკმაყოფილებელია და საფრთხეს არ წარმოადგენს.

ნინო ნიჟარაძის ინფორმაციით, ბათუმში ჩინეთიდან ოთხი ქალი გუშინ ჩავიდა, ორ მათგანს ტემპერატურა ჰქონდა, რის გამოც მათზე დაკვირვება მიმდინარეობს.

„37 გრადუსი ტემპერატურა აღენიშნებოდათ. ვინაიდან ისინი 400 კილომეტრით შორს ცხოვრობენ ჩინეთის იმ პროვინციიდან, სადაც კორონავირუსი დაფიქსირდა, მათზე ხორციელდება დაკვირვება. ორჯერ ჩაუტარდათ ჯანმრთელობის მდგომარეობის სკრინინგი, ანალიზები გადაიგზავნა ლაბორატორიაში და სავარაუდოდ, ხვალ იქნება პასუხი. საგანგაშო არაფერია, შესაძლოა ტემპერატურა მათ სხვა, უფრო გავრცელებული რესპირატორული დაავადების გამო ჰქონოდათ. დღეისათვის მათ ტემპერატურა უკვე აღარ აქვთ და მათი გადაადგილება არის აბსოლუტურად უსაფრთხო. ისინი დღეს დატოვებენ ბათუმს და დაკვირვება 14 დღის განმავლობაში გაგრძელდება იმ რეგიონის შესაბამისი სამსახურების მიერ, სადაც ისინი გადაადგილდებიან"-განაცხადა ნინო ნიჟარაძემ.