ჩვენთვის ყოველთვის ყურადსაღებია ჩვენი დასავლელი, ამერიკელი პარტნიორების, ხელისუფლების სხვადასხვა შტოს წარმომადგენლების ესა თუ ის განცხადება. მიუხედავად იმისა, რომ ზოგჯერ და განსაკუთრებით ამ ბოლო პერიოდში გადაუმოწმებელ და არასწორ ინფორმაციას ეყრდნობა ეს განცხადება, - ამის შესახებ ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ განაცხადა.

თურნავას განცხადებით, ხელისუფლება აძლიერებს საინფორმაციო წყაროებს, რათა მაქსიმალურად სწორი ინფორმაცია მიაწოდოს ამერიკის შეერთებული შტატების სხვადასხვა სახელისუფლებო შტოს წარმომადგენლებს.

„რა თქმა უნდა, სენატორების განცხადება არ დარჩება ხელისუფლების მხრიდან უყურადღებოდ და რეაგირების გარეშე. ჩვენთვის ყოველთვის ყურადსაღებია ჩვენი დასავლელი, ამერიკელი პარტნიორების ხელისუფლების სხვადასხვა შტოს წარმომადგენლების ესა თუ ის განცხადება, მიუხედავად იმისა, რომ ზოგჯერ და ამ ბოლო პერიოდში განსაკუთრებით, გადაუმოწმებელ და არასწორ ინფორმაციას ეყრდნობა ეს განცხადება, მაგრამ ჩვენ ყურდღებით ვეცნობით ამ განცხადებებს და შესაბამისი რეაგირებაც, რა თქმა უნდა, მოჰყვება. ჩვენი მხრიდან ვაძლიერებთ ჩვენს საინფორმაციო წყაროებს, მაქსიმალურად შევეცდებით, რომ სწორი ინფორმაცია მივაწოდოთ ამერიკის შეერთებული შტატების სხვადასხვა სახელისუფლებო შტოს წარმომადგენლებს. მე მაგალითად მოვიყვანდი „ფრონტერას“ ქეისს, როდესაც აშკარად მცდარი, არასწორი ინფორმაცია იყო მიწოდებული“, - განაცხადა ნათია თურნავამ.