ინფექციური საავადმყოფოში გადაყვანილ ორ ჩინელ მცირეწლოვანს პირველად პროტოკოლურ კვლევებს ჩაუტარებენ, ასევე დღესვე აუღებენ ანალიზებს შესაძლო 10 ვირუსულ პათოგენზე, რომლის პასუხიც სავარაუდოდ, დღის განმავლობაში განისაზღვრება. როგორც ჟურნალისტებთან ინფექციური პათოლოგიის ცენტრის სამედიცინო დირექტორი მარინა ეზუგბაია განმარტავს, იმ შემთხვევაში, თუ ყველა მათგანზე პასუხი უარყოფითი აღმოჩნდა, გაგრძელდება მეთვალყურეობა როგორც კორონავირუსის შესაძლო დაავადებაზე.

„პირველ ეტაპზე მათ ჩაუტარდებათ ძირითადი პროტოკოლური კვლევები, რაც ასეთ მძიმე მწვავე რესპირატორულ ინფექციას ესაჭიროება - პირველ რიგში, რენდგენოგრაფიული გამოკვლევა ფილტვის, სისხლის ანთებითი მარკერების განსაზღვრა. გარდა ამისა, დაავადებათა კონტროლის სამსახური ინფორმირებულია და დღესვე აუღებენ ანალიზებს შესაძლო დაახლოებით 10 ვირუსულ პათოგენზე, რომლის პასუხიც ალბათ, დღის განმავლობაში განისაზღვრება, ამ პასუხით გადაწყდება სხვა შესაძლო ვირუსული დაავადება არის თუ არა. თუ ყველა შესაძლო პათოგენზე პასუხი უარყოფითი იქნება, ამ შემთხვევაში როგორც შესაძლო დაავადება კორონავირუსზე გავაგრძელებთ მეთვალყურეობას და გამოვლენილი კლინიკის მიხედვით მოხდება მათი მართვა,“- განაცხადა მარინა ეზუგბაიამ.

მისივე თქმით, როგორც მას აცნობეს, ბავშვებს ავადობის მესამე დღე აქვთ და მათი მდგომარეობა დინამიკაში გაუმჯობესებულია.

„როგორც ვიცი, მათ აქვთ ცხელება და ხველა, დღეს არის დაავადების მესამე დღე და პირველი დღესთან შედარებით მდგომარეობა გაუმჯობესებულია. ტემპერატურული მაჩვენებელი დღეს უკვე არ აღემატება 38-ს და სუბიექტურ - ობიექტური მონაცემებით დინამიკაში გაუმჯობესებაა“, - განაცხადა მარინა ეზუგბაიამ.

შეგახსენებთ, ყაზბეგიდან ინფექციურ საავდმყოფოში გადმოყვანილი ჩინეთის 9 მოქალაქიდან ორ ბავშვს აღენიშნება ტემპერატურის მომატება და ისინი მოთავსდებიან ბოქსირებულ განყოფილებაში.