"ევროპული საქართველოს" ახალგაზრდულმა გუნდმა საქართველოს გენერალურ პროკურატურასთან აქცია-პერფორმანსი გამართა.

მათ საპროკურორო საბჭოში ირაკლი შოთაძის კანდიდატურის წარდგენა გააპროტესტეს და საპროკურორო საბჭოს წევრებს მოუწოდეს, რომ მის კანდიდატურას მხარი არ დაუჭირონ.

აქციის მონაწილეებმა სიმბოლურად სათამაშო დანები მიიტანეს, რითაც ირაკლი შოთაძის მიერ ხორავას ქუჩის საქმეზე მტკიცებულებების გაყალბებას გაუსვეს ხაზი.

"დღეს „ევროპული საქართველოს" ახალგაზრდული გუნდი საქართველოს გენერალურ პროკურატურასთან შეიკრიბა, რათა გააპროტესტოს ის ფარსი, რომელიც ამ შენობაში მიმდინარეობს. როგორც იცით, საპროკურორო საბჭოში ამ წუთებშიც პროკურორობის კანდიდატებთან გასაუბრება მიმდინარეობს. მათ შორის ყველამ იცის წინასწარ, რომ ირაკლი შოთაძე კვლავ იქნება არჩეული გენერალურ პროკურორად, რაც მიუღებელია ჩვენთვის და ვაპროტესტებთ. ადამიანს, რომელიც თავად არის ბრალდებული მტკიცებულებების გაყალბებაში, გამყალბებელი პროკურორის ხელის დაფარებაში, გამოუძიებელი საქმეების მიფუჩეჩებაში, მეორედ შეიძლება გახდეს ამ ქვეყნის მთავარი ბრალმდებელი, რაც მიუღებელია",-განაცხადა "ევროპული საქართველოს" წევრმა კონსტანტინე შუბითიძემ.