ევროპის საბჭოს მინისტრთა კომიტეტის თავმჯდომარე, საგარეო საქმეთა მინისტრი დავით ზალკალიანი ვენაში ვიზიტის ფარგლებში, ეუთო-ს გენერალურ მდივანს ტომას გრემინგერს შეხვდა.

როგორც „ინტერპრესნიუსს“ საგარეო საქმეთა სამინისტროდან აცნობეს, მხარეებმა მიმოიხილეს ევროპის საბჭოსა და ეუთო-ს თანამშრომლობის საკითხები, გენერალური მდივნის მხრიდან მაღალი შეფასება მიეცა საქართველოს თავმჯდომარეობის პრიორიტეტებს და გამოითქვა ეუთო-ს მხრიდან აქტიური თანამშრომლობის მზაობა, როგორც ეუთო-ს სივრცეში პრიორიტეტით განსაზღვრული საკითხების პოპულარიზაციაში, ასევე ეფექტურ იმპლემენტაციაში. შეხვედრის ფარგლებში, მხარეებმა მიმოიხილეს ორმხრივ ფორმატში საქართველო - ეუთო-ს თანამშრომლობის საკითხები. განსაკუთრებული ყურადღება გამახვილდა ოკუპირებულ ტერიტორიებზე შექმნილ ურთულეს ვითარებაზე და საოკუპაციო რეჟიმის ქმედებებზე, რაც ართულებს ადგილზე მოსახლეობის უსაფრთხოებისა და ჰუმანიტარულ მდგომარეობას. საუბარი ასევე შეეხო ჟენევის მოლაპარაკებების მიმდინარეობას და ეუთო-ს ჩართულობას კონფლიქტის მშვიდობიანი დარეგულირების და ადგილზე მოსახლეობისთვის უსაფრთხოების უზრუნველყოფის საკითხში. აღსანიშნავია, რომ ვიზიტის ფარგლებში, დავით ზალკალიანი ევროპის საბჭოს თავმჯდომარის რანგში სიტყვით გამოვიდა ეუთო-ს მუდმივი კომიტეტის სხდომაზე, ასევე შეხვედრა გამართა ეუთო-ში საქართველოს მეგობარი ჯგუფის ქვეყნების მუდმივ წარმომადგენლებთან.