რუსთავში, კოსტავას გამზირის სრული რეაბილიტაციის პროექტის ფარგლებში, ინფრასტრუქტურული სამუშაოები აქტიურად მიმდინარეობს

რუსთავში, კოსტავას გამზირის სრული რეაბილიტაციის პროექტის ფარგლებში, ინფრასტრუქტურული სამუშაოები აქტიურად მიმდინარეობს. ამის შესახებ „ინტერპრესნიუსს“ რუსთავის მერიიდან აცნობეს.
მათი ინფორმაციით, პირველ ეტაპზე, რეკონსტრუქცია ჩაუტარდა საცხოვრებელი კორპუსების ფასადებს, მოხდა დაზიანებული აივნების აღდგენა, დაემატა დეკორატიული და ფუნქციური ელემენტები, დამონტაჟდა დეკორატიული განათება.
„2019 წლის ბოლოს, კი კოსტავას გამზირზე, უკვე მეორე ინფრასტრუქტურული პროექტის განხორციელება დაიწყო. ტერიტორიაზე შეიცვალა მიწისქვეშა კომუნიკაციები - სანიაღვრე და წყალსადენის სისტემები. ამჟამად, გზის სავალ ნაწილზე ასფალტის საფარი იგება და ეწყობა ბორდიურები, ტროტუარების მოსაპირკეთებლად მიმდინარეობს მოსამზადებელი სამუშაოები.
პროექტის ფარგლებში გზის ორივე მხარეს დაიგება ასფალტის საფარი, მოპირკეთდება ტროტუარები, მოეწყობა ველობილიკები და დამონტაჟდება გარე განათების თანამდროვე სისტემა. კოსტავას გამზირის რეაბილიტაციის პროექტის მეორე ეტაპის ფარგლებში გათვალისწინებულია შუაგამყოფი ზოლის გამწვანება, რომელიც სამუშაოების დასრულების შემდეგ რეკრეაციული სივრცის სახეს მიიღებს.
პროექტის განხორციელების შემდეგ, კოსტავას გამზირი მთლიანად იქნება რეაბილიტირებული“,-ნათქვამია ინფორმაციაში. მერიის ცნობით, სამუშაოებისთვის 3 700 000 ლარია გათვალისწინებული.

























