იმედი მაქვს, მომდევნო რაუნდში, რომელიც ძალიან მალე იქნება, ოპოზიციის მხრიდანაც კონსტრუქციულ დამოკიდებულებას დავინახავთ, - ამის შესახებ პარლამენტის ვიცე-სპიკერმა გიორგი კახიანმა ჟურნალისტებს განუცხადა.

მისი თქმით, ოპოზიციის მიერ კომპრომისზე წასვლის შემთხვევაში, ხელისუფლებასა და ოპოზიციას შორის საარჩევნო სისტემის კონკრეტულ მოდელზე შეთანხმება აუცილებლად მოხდება.

"კონგრესმენების, ეუთო/ოდირი-ს თუ სხვა პარტნიორების განცხადებაში იკვეთება თხოვნა, რომ შევჯერდეთ კონკრეტულ საარჩევნო მოდელზე. ახლა ძალაშია შერეული საარჩევნო სისტემის მოდელი 77/73-ზე, ოპოზიცია კი ითხოვს სრულად პროპორციული სისტემის საფუძველზე არჩევნების ჩატარებას. კომპრომისის სასარგებლოდ ჩვენ ნაბიჯი გადავდგით, რაც გულისხმობს პროპორციული წესით მანდატების გაზრდას და მაჟორიტარული წესით - შემცირებას. იმედი მაქვს, ოპოზიციის მხრიდანაც იქნება ანალოგიური დამოკიდებულება, რადგან შეთანხმება ორივე მხრიდან გარკვეული ნაბიჯების გადადგმას გულისხმობს. ჩვენ ეს გავაკეთეთ, ახლა ბურთი ოპოზიციის მოედანზეა და იმედი მაქვს, მომდევნო რაუნდში, რომელიც ძალიან მალე იქნება, მათი მხრიდანაც კონსტრუქციულ დამოკიდებულებას დავინახავთ. ასეთ შემთხვევაში აუცილებლად შევჯერდებით კონკრეტულ მოდელზე. რაც შეეხება ე.წ. "გერმანულ მოდელს", მის არაკონსტიტუციურობაზე ჩვენი მოსაზრება არ შეცვლილა,"- განაცხადა კახიანმა.