ბათუმში მთელი ღამის განმავლობაში უწყვეტ რეჟიმში მიმდინარეობდა გზების გაწმენდა და ტექნიკური მარილის დაყრა, - ამის შესახებ „ინტერპრესნიუსს“ ბათუმის მერიიდან აცნობეს.

„დილის 06:00 საათიდან დაიწყო და ახლაც გრძელდება სკოლებთან, საბავშვო ბაღებთან, სამედიცინო დაწესებულებებთან, სტრატეგიულ ობიექტებთან მისასვლელი ტერიტორიების თოვლის საფარისგან გაწმენდა.

ბათუმის მერიის შესაბამისი სამსახურები 3 დღის განმავლობაში უწყვეტ რეჟიმში ახორციელებენ გზების გაწმენდას, დათოვლილი ხე-მცენარეების დაფერთხვასა და ზღვაში გამსვლელი სანიაღვრე არხების გახსნას.

მკვეთრი დახრილობის სახურავებიან შენობებთან იქმნება თოვლის მასის ჩამოცურების საშიშროება. საფრთხის თავიდან აცილების მიზნით, მოსახლეობას ვთხოვთ, თავი შეიკავონ ასეთ ადგილებში მოძრაობისგან“, - აღნიშნულია ბათუმის მერიის მიერ გავრცელებულ ინფორმაციაში.