დავით ზალკალიანი პოლონელ დიპლომატს ევროკავშირის სადამკვირვებლო მისიის ხელმძღვანელად დანიშვნას ულოცავს. როგორც „ინტერპრესნიუსს“ საგარეო საქმეთა სამინისტროდან აცნობეს, დავით ზალკალიანმა მარეკ შჩიგიელს აღნიშნულ თანამდებობაზე დანიშვნა Twitter-ის საშუალებით მიულოცა.
„ბატონ მარეკ შჩიგიელს ვულოცავ საქართველოში ევროკავშირის სადამკვირვებლო მისიის ხელმძღვანელად დანიშვნას. პოლონელ დიპლომატს ვუსურვებ წარმატებას ამ ძალიან მნიშვნელოვანი, მაგრამ რთული დავალების შესრულებაში.
მსურს გამოვთქვა უსაფრთხოებისა და ადამიანის უფლებების საკითხებზე თანამშრომლობის მტკიცე სურვილი“, – წერს ზალკალიანი.
მარეკ შჩიგიელი საქართველოში ევროკავშირის სადამკვირვებლო მისიის ხელმძღვანელის მოვალეობის შესრულებას 2020 წლის 15 მარტს შეუდგება.