ქუთაისის სკოლების ნაწილში ხვალ სწავლა შეწყდება. მიზეზი "სოკარ გაზის" ცენტრალურ გამანაწილებელ ქსელში მომხდარი ავარიული შეფერხებაა.
საგანმანათლებლო რესურსცენტრის ხელმძღვანელის მაია ცქიტიშვილის თქმით, ქალაქის მასშტაბით სასწავლო პროცესი 20 სკოლაში შეჩერდება. მისივე განმარტებით, მიმდინარეობს სამუშაოები და რადგან დაზუსტებით არ იყო ცნობილი, მოხდებოდა თუ არა ბუნებრივი აირის მიწოდების აღდგენა, ამიტომ, სწავლის შეჩერების გადაწყვეტილება მიიღეს. მისივე თქმით, გაცდენილი საათები შაბათ დღეს ანაზღაურდება.
სააღმზრდელო პროცესი, შესაძლოა, შეწყდეს ბაღების ნაწილშიც. ააიპ ბაგა-ბაღების გაერთიანების განცხადებით, თუ დილით გაზის მოწოდება არ აღდგება, ბავშვებს არ მიიღებენ.
დღეს "სოკარ გაზში" მომხდარი ავარიის გამო, ბუნებრივი აირი 44 000 აბონენტს და სტრატეგიულ ობიექტებს არ მიეწოდებოდა. ნაწილს ბუნებრივი აირის მიწოდება აღუდგა, ნაწილს ხვალ საღამომდე აღუდგება.