12-13 თებერვალს, ზურაბ ჟვანიას სახელობის სახელმწიფო ადმინისტრირების სკოლამ, სამცხე-ჯავახეთის რეგიონში კერძოდ, ნინოწმინდაში, ახალქალაქსა და ახალციხეში სერტიფიკატების გადაცემის ღონისძიებები გამართა.
როგორც „ინტერპრესნიუსს“ ზურაბ ჟვანიას სახელობის სახელმწიფო ადმინისტრირების სკოლიდან აცნობეს, ჟვანიას სკოლის დირექტორის მოადგილემ პაატა კლდიაშვილმა ადგილობრივი ხელისუფლების წარმომადგენლებთან ერთად სერტიფიკატები „სახელმწიფო ენის სწავლების პროგრამის“ 190 წარმატებულ კურსდამთავრებულს გადასცა. ეროვნული უმცირესობის წარმომადგენლებმა სახელმწიფო ენის პროგრამის A1, A2, B1 და B1+ დონის სასწავლო კურსები გაიარეს. სასწავლო პროცესი მიმდინარეობდა როგორც რეგიონულ სასწავლო ცენტრებში, ისე მობილურ ჯგუფებში და მას ჟვანიას სკოლის კვალიფიციური ტრენერები უძღვებოდნენ.
„სერტიფიკატების გადაცემის ღონისძიებებს დაესწრნენ ადგილობრივი ხელისუფლებისა და პარტნიორი ორგანიზაციების წარმომადგენლები, ჟვანიას სკოლის თანამშრომლები, ტრენერები, ბენეფიციარები“, - ნათქვამია ინფორმაციაში.