დეპუტატ ემზარ კვიციანის ძმისშვილი, რომელიც მეგობრის მკვლელობაზეა ბრალდებული, კვლავ პატიმრობაში რჩება.
დღევანდელ სასამართლო პროცესზე კვიციანის მიმართ შეფარდებული აღკვეთის ღონისძიება პატიმრობა გადაისინჯა და მოსამართლე ალექსანდრე იაშვილის გადაწყვეტილებით, ის ძალაში დარჩა.
მოსამართლის განმარტებით, მხარეებს იმგვარი ახალი მტკიცებულება და ახალი გარემოება არ წარმოუდგენია, რომელიც პატიმრობის ძალაში დატოვებას გააქარწყლებდა.
ბრალდების მხარე კვიციანის მიმართ მკაცრი ღონისძიების ძალაში დატოვებას, დაცვის მხარე კი მისი აღკვეთის ღონისძიების გარეშე დატოვებას მოითხოვდა.
ცნობისთვის, თბილისის ზღვის ტერიტორიაზე ახალგაზრდა მამაკაცის მკვლელობის ბრალდებით მისი მეგობარი, დეპუტატ ემზარ კვიციანის ძმისშვილი, ბექა კვიციანი რამდენიმე დღიანი ძებნის შემდეგ დააკავეს. მას ბრალი განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარების ფაქტზე საქართველოს სსკ-ის 108-ე მუხლით, ასევე, 236-ე მუხლის მე-3 და მე-4 ნაწილებით აქვს წარდგენილი. ბექა კვიციანს ასევე ბრალი ედება დროებითი მოთავსების იზოლატორში პოლიციელებზე თავდასხმაში.
შემდეგი სასამართლო სხდომა 25 თებერვალს, 16:00 საათზე გაიმართება.