რუსეთს არ მიუღია რაიმე სახის ინფორმაცია საქართველოსა და უკრაინის პრეზიდენტების ადმინისტრაციებიდან მაისში, გამარჯვების 75 წლის აღსანიშნავ ღონისძიებებზე დასწრებასთან დაკავშირებით. ამის შესახებ რუსეთის საგარეო საქმეთა მინისტრის მოადგილე ანდრეი რუდენკომ განაცხადა.
„ყოველ შემთხვევში, რუსეთის საგარეო საქმეთა სამინისტროში ამის შესახებ არაფერი იციან“, - განუცხადა რუდენკომ რუს ჟურნალისტებს კითხვაზე, მიიღო თუ არა რუსეთმა რაიმე სახის პასუხი სალომე ზურაბიშვილისა და ვლადიმერ ზელენსკის ადმინისტრაციებიდან, მათი შესაძლო მონაწილეობის შესახებ 9 მაისის ღონისძიებებზე მოსკოვში.
რუსეთის პრეზიდენტის თანაშემწის იური უშაკოვის ინფორმაციით, 17 ქვეყნის ლიდერმა მოსკოვში ჩასვლისა და გამარჯვების დღისადმი მიძღვნილ ღონისძიებებში მონაწილეობის შესახებ თანხმობა განაცხადა.