კავკასიის საერთაშორისო უნივერსიტეტში სამეცნიერო კრებულის პროექტის - „პირველი ქართული კონსტიტუციის 100 წელი“ – პრეზენტაცია გაიმართა

2021 წლის 21 თებერვალს აღინიშნება მნიშვნელოვანი მოვლენა ჩვენი ქვეყნის ისტორიაში - საქართველოს დემოკრატიული რესპუბლიკის პირველი კონსტიტუციის მიღების 100 წლის იუბილე, - ამის შესახებ „ინტერპრესნიუსს“ კავკასიის საერთაშორისო უნივერსიტეტიდან აცნობეს. მათივე ცნობით, ამ თარიღთან დაკავშირებით, დღეს უნივერსიტეტში გაიმართა საერთაშორისო სამეცნიერო კრებულის პროექტის „პირველი ქართული კონსტიტუციის 100 წელი“ პრეზენტაცია, რომელსაც ესწრებოდნენ უნივერსიტეტის სტუდენტები, აკადემიური პერსონალი და მოწვეული სტუმრები.

მათივე ინფორმაციით, პროექტის მიზანია ქართული კონსტიტუციონალიზმის დამოუკიდებელი სკოლის ჩამოყალიბებისა და პირველი ქართული კონსტიტუციის პოპულარიზაციისათვის ხელისშეწყობა.

„ამ მიზნით, უნივერსიტეტში შექმნილია სპეციალური სამეცნიერო-სარედაქციო კოლეგია, რომელიც უზრუნველყოფს საქართველოს დემოკრატიული რესპუბლიკის პირველი კონსტიტუციის 100 წლისთავისადმი მიძღვნილი საერთაშორისო სამეცნიერო კრებულის მომზადებას და მის გამოცემას. კრებულში სამეცნიერო სტატიები სარედაქციო კოლეგიის მოწვევით დაიბეჭდება. აქ წარმოდგენილი იქნება სამართლის, ისტორიის, პოლიტიკისა და ენათმეცნიერების დარგის აღიარებული უცხოელი და ქართველი მეცნიერების შრომები პირველი ქართული კონსტიტუციის, კონსტიტუციონალიზმისა და პოლიტიკის მეცნიერების აქტუალურ და პრობლემურ საკითხებზე. პროექტში მონაწილეობს 25 მეცნიერი.

პრეზენტაციაზე ითქვა, რომ ყოველი დემოკრატიული ქვეყნის ისტორიაში კონსტიტუციის მიღებას უდიდესი მნიშვნელობა ენიჭება. თანამედროვე ქართული სახელმწიფო პირველი რესპუბლიკის სამართალმემკვიდრეა. ეს აღიარებულია საქართველოს 1995 წლის 24 აგვისტოს კონსტიტუციის პრეამბულაში. სწორედ დღევანდელი კონსტიტუცია განაპირობებს უწყვეტ მემკვიდრეობით კავშირს პირველ რესპუბლიკასა და თანამედროვე ქართულ სახელმწიფოს შორის. საქართველოს დემოკრატიული რესპუბლიკის გვირგვინი, ქართული კონსტიტუციონალიზმის თავფურცელი - 1921 წლის კონსტიტუციაა.

პირველი ქართული კონსტიტუციის ბევრი ნორმა თუ პრინციპი სიცოცხლისუნარიანობას საქართველოს მოქმედ კონსტიტუციაში ინარჩუნებს. 1921 წლის კონსტიტუცია ქართული კონსტიტუციონალიზმის ფუნდამენტია. 90-იანი წლებიდან მოყოლებული საქართველოს ყველა უმნიშვნელოვანეს დოკუმენტს 1921 წლის კონსტიტუციის „სული“ წითელ ზოლად გასდევს. პირველი კონსტიტუცია მუდმივად იყო აქტუალური 1990-იანი წლებიდან მოყოლებული ყველა საკონსტიტუციო რეფორმის პროცესში.

პრეზენტაციაზე აღინიშნა, რომ ამ გამოცემით კავკასიის საერთაშორისო უნივერსიტეტი ხელს შეუწყობს, ერთი მხრივ, პირველი ქართული კონსტიტუციის პოპულარიზაციას, მის ირგვლივ დისკურსის გაღვივებას, ქართული კონსტიტუციონალიზმისთვის არსებითი პრობლემების გადაჭრის გზების ძიებას და, მეორე მხრივ, იმ ღვაწლმოსილ ადამიანთა ამაგის დაფასებას, რომლებმაც საფუძველი ჩაუყარეს ქართულ კონსტიტუციონალიზმს.

პრეზენტაციაზე სიტყვით გამოვიდნენ კავკასიის საერთაშორისო უნივერსიტეტის სამართლის სადოქტორო პროგრამის ხელმძღვანელი, პროფესორი მინდია უგრეხელიძე, კავკასიის საერთაშორისო უნივერსიტეტის სამართლის ფაკულტეტის დეკანი ვლადიმერ მაჭარაშვილი, სამართლის ფაკულტეტის დეკანის მოადგილე თამთა წირქვაძე, სამეცნიერო კვლევების დეპარტამენტის უფროსის მოადგილე ნინო მინდიაშვილი. პირველი კონსტიტუციის მნიშვნელობაზე ისაუბრეს კონსტიტუციონალისტებმა გია გოგიბერიძემ და ზურაბ ჯიბღაშვილმა. საიუბილეო სამეცნიერო კრებულის პროექტზე მსმენელებს ინფორმაცია მიაწოდა ბექა ქანთარიამ.

პროექტის იდეის ავტორები არიან კავკასიის საერთაშორისო უნივერსიტეტის პროფესორი მინდია უგრეხელიძე და ასოცირებული პროფესორი ბექა ქანთარია.

სამეცნიერო კრებულის პრეზენტაცია შედგება 2021 წლის 21 თებერვალს - პირველი კონსტიტუციის მიღების დღეს - 100 წლის იუბილეზე“, - ნათქვამია ინფორმაციაში.

ტოომას ჰენდრიკ ილვესი - არ გჭირდებათ ევროკავშირის დროშების ყველგან აღმართვა, თუ მის ღირებულებებს არ იზიარებთ - სიტყვების თქმით: ”ჩვენ ევროპელები ვართ“, ევროკავშირში ავტომატურად ვერ შეხვალთ
ქართული პრესის მიმოხილვა 09.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ბექა ნაცვლიშვილი - როგორც ჩანს, "ქართული ოცნება“ ემზადება მოლაპარაკების მესამე რაუნდისთვის და აგრძელებს კომუნიკაციას ევროკავშირთან, ამის შედეგი კი იქნება ის, თუ რა მოხდება მელიას გადადებულ სასამართლოზე
კახა ოქრიაშვილი - 15 მაისის აქციის სამზადისში აქტიურად ვარ ჩართული
ხარისხი გარანტირებულია: "კარფური" „მასტერშეფის“ ახალი სეზონის გენერალური სპონსორი და მხარდამჭერი გახდა