საქართველოში კანადის ახალდანიშნულმა ელჩმა საქართველოს საგარეო საქმეთა მინისტრის პირველ მოადგილეს რწმუნებათა სიგელების ასლები გადასცა

საქართველოში კანადის ახალდანიშნულმა ელჩმა (რეზიდენციით ქ. ანკარა), ჯამალ ქოქარმა რწმუნებათა სიგელების ასლები საქართველოს საგარეო საქმეთა მინისტრის პირველ მოადგილეს, ვახტანგ მახარობლიშვილს გადასცა. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

მათი ინფორმაციით, საგარეო საქმეთა მინისტრის პირველმა მოადგილემ კანადელ დიპლომატს საქართველოში ელჩად დანიშვნა მიულოცა და წარმატებები უსურვა მომავალ საქმიანობაში.

რწმუნებათა სიგელების ასლების გადაცემის შემდეგ გაიმართა ორმხრივი შეხვედრა, რომელშიც მონაწილეობა მიიღო კანადის საგარეო საქმეთა სამინისტროს არქტიკის, ევრაზიისა და ევროპულ საქმეთა დირექტორატის გენერალური დირექტორი, დევიდ სპრული.

„შეხვედრა მხარეებმა ვრცლად მიმოიხილეს ორ ქვეყანას შორის მიმდინარე თანამშრომლობის ძირითადი მიმართულებები და მათი შემდგომი გაღრმავების პერსპექტივები. ხაზი გაესვა საერთაშორისო ფორუმების ფარგლებში ბოლო დროს გამართული მაღალი დონის შეხვედრებისა და პოლიტიკური კონსულტაციების მნიშვნელობას, რომლებმაც ახალი დინამიკა შესძინეს ორმხრივ ურთიერთობებს.

ორმხრივი ურთიერთობების პარალელურად, მხარეებმა ასევე განიხილეს მრავალმხრივ ფორმატებსა და საერთაშორისო ორგანიზაციების ფარგლებში თანამშრომლობის საკითხები.

განსაკუთრებით აღინიშნა კანადის მტკიცე მხარდაჭერა საქართველოს ტერიტორიული მთლიანობისა და სუვერენიტეტის, ასევე, ქვეყნის ევროპული და ევროატლანტიკური მისწრაფებების მიმართ.

შეხვედრის ფარგლებში მხარეებმა ასევე მიმოიხილეს რეგიონში მიმდინარე პროცესები, მათ შორის, უსაფრთხოების კუთხით არსებული გამოწვევები. მინისტრის პირველმა მოადგილემ ყურადღება გაამახვილა რუსეთის მიერ საქართველოს ტერიტორიების ოკუპაციის, მცოცავი ანექსიის, უკანონო ბორდერიზაციისა და ოკუპირებულ რეგიონებში ადამიანის უფლებათა მასობრივი დარღვევის ფაქტებზე. ხაზი გაესვა საერთაშორისო თანამეგობრობის აქტიური ჩართულობისა და მხარდაჭერის მნიშვნელობას კონფლიქტის მშვიდობიანი დარეგულირებისა და დეოკუპაციის საქმეში.

შეხვედრაზე ასევე განიხილეს საქართველოსა და კანადას შორის მიმდინარე მჭიდრო თანამშრომლობა თავდაცვისა და უსაფრთხოების სფეროში და მათი შემდგომი განვითარების პერსპექტივები. განსაკუთრებული ყურადღება გამახვილდა უსაფრთხოების სფეროში თანამშრომლობის განვითარებაზე, რუსეთის მიერ ბოლო პერიოდში განხორციელებული კიბერ-შეტევების გათვალისწინებით.

საუბარი შეეხო ორმხრივი ეკონომიკური თანამშრომლობის პრიორიტეტულ საკითხებს. ხაზი გაესვა ამ კუთხით ძალისხმევის გააქტიურების მნიშვნელობას არსებული პოტენციალის სრულად გამოყენების მიზნით. მხარეებმა კმაყოფილებით აღნიშნეს „უცხოური ინვესტიციების დაცვის შესახებ შეთანხმებაზე“ გამართული მოლაპარაკებების სამივე რაუნდი და იმედი გამოთქვეს, რომ შეთანხმების დადება სავაჭრო ურთიერთობების წახალისების კარგი შესაძლებლობას შექმნის.

შეხვედრის დასასრულს, მხარეები შეთანხმდნენ განაგრძონ აქტიური მუშაობა ორ ქვეყანას შორის არსებული მჭიდრო თანამშრომლობის შემდგომ გაღრმავებაზე“, - აღნიშნულია ინფორმაციაში.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 14.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
თანაბარი განათლება მაღალმთიანი სოფლების ბავშვებს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით