რუსეთის დუმის დეპუტატი გიგი წერეთლის მიმართ უკმაყოფილებას გამოთქვამს და აცხადებს, რომ წერეთელმა ვენაში სიტყვით გამოსვლის საშუალება არ მისცა
რუსეთის დუმის დეპუტატი და წარსულში რუსეთის მთავარი სანიტარული ექიმი გენადი ონიშენკო ეუთო-ს საპარლამენტო ასამბლეის პრეზიდენტის გიგი წერეთლის მიმართ უკმაყოფილებას გამოთქვამს, რომელმაც მას სიტყვით გამოსვლის საშუალება არ მისცა. ამის შესახებ ონიშენკომ რუსულ მედიას განუცხადა.
მისი თქმით, სამი კომიტეტის გაერთიანებულ სხდომაზე, ვენაში მას საშუალება არ მიეცა ანტისემიტიზმისა და მეორე მსოფლიო ომის შედეგების გადახედვის საკითხზე საკუთარი მოსაზრება გამოეთქვა.
„განხილვაში ჩავეწერე, მაგრამ საპარლამენტო ასამბლეის პრეზიდენტმა ბატონმა გიორგი წერეთელმა იმ მოტივით, რომ დრო აღარ დარჩა, სიტყვა არ მომცა, მიუხედავად იმისა, რომ ჩვენი დელეგაციის წევრებს სიტყვით გამოსვლის საშუალება მიეცათ“, - განაცხადა ონიშენკომ.
