დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორმა ქვემო ქართლში სახელმწიფო რწმუნებულთან და მერებთან შეხვედრა გამართა
დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორმა ბესარიონ სიმონიშვილმა ქვემო ქართლში სახელმწიფო რწმუნებულთან შოთა რეხვიაშვილთან და მხარის მუნიციპალიტეტების მერებთან შეხვედრა გამართა. ამის შესახებ „ინტერპრესნიუსს“ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროდან აცნობეს.
მათი ინფორმაციით, შეხვედრაზე რეგიონში მცხოვრები დევნილებისა და ეკომიგრანტების განსახლების, მათი საარსებო წყაროებით უზრუნველყოფის საკითხებსა და არსებულ პრობლემებზე იმსჯელეს.
ბესარიონ სიმონიშვილის განცხადებით, გერმანიის მთავრობის დაფინანსებით, ქვემო ქართლის რეგიონში, წლების განმავლობაში ნგრევად შენობაში მცხოვრები დევნილი ოჯახებისთვის სოფლის ტიპის დასახლება შენდება.
როგორც უწყებაში განმარტეს, სახელმწიფო რწმუნებულთან და მუნიციპალიტეტების მერებთან გამართულ შეხვედრაზე დევნილთა, ეკომიგრანტთა და საარსებო წყაროებით უზრუნველყოფის სააგენტოს დირექტორმა ქვემო ქართლის ტერიტორიული სამმართველოს ხელმძღვანელი გოჩა მესტვირიშვილი წარადგინა.
