ქუთაისის დავით კაკაბაძის სახელობის გალერეაში სოფია გოდუაძე-მიტევას და ვალენტინ მიტევის ფერწერული ნამუშევრების გამოფენა "სიყვარულის შთაგონებით“ გაიმართა.
იმერეთში სახელმწიფო რწმუნებულის პრესსამსახურის ინფორმაციით, ღონისძიება საქართველოში ბულგარეთის საელჩოს, იმერეთში სახელმწიფო რწმუნებულის ადმინისტრაციისა და ქუთაისის მერიის მხარდაჭერით მოეწყო და ბულგარეთის ნაციონალურ დღესასწაულს 3 მარტს მიეძღვნა.
„კოლექციის შემოქმედებითი მოტივაციის და შთაგონების წყარო ქართულ-ბულგარული ურთიერთობები გახდა, ინსპირაცია კი - როგორ ვუყუროთ სამყაროს სიყვარულის თვალებით, ამიტომ გამოფენის სლოგანი "ქართველი სოფია სოფიაში“ იყო.
წარმოდგენილი ნამუშევრები იმერეთში სახელმწიფო რწმუნებულმა ზვიად შალამბერიძემ, პირველმა მოადგილემ იოსებ ხახალეიშვილმა, ბულგარეთის საგანგებო და სრულუფლებიანმა ელჩმა საქართველოში დესისლავა ივანოვამ და სხვა მოწვეულმა სტუმრებმა დაათვალიერეს“, - ნათქვამია ინფორმაციაში.