„ევროპული საქართველოს“ ერთ-ერთი ლიდერის, გიგა ბოკერიას განცხადებით, ცუდია, რომ ხელისუფლებამ ევროსაბჭოს მინისტრთა კომიტეტის სხდომის სტრასბურგში გამართვის გადაწყვეტილება ოპოზიციის პროტესტის შიშის გამო მიიღო და არა ქვეყნის ეროვნული ინტერესებიდან გამომდინარე.

როგორც ბოკერიამ ჟურნალისტებს განუცხადა, საგარეო საქმეთა მინისტრის, დავით ზალკალიანის განცხადება, რომ მათ ამ გადაწყვეტილებით ესკალაციას აარიდეს თავი, ამას მოწმობს.

„ცუდია, რომ ეს მოხდა მხოლოდ იმიტომ, რომ იყო საზოგადოების და დემოკრატიული ოპოზიციის წნეხი. ამის შეეშინდათ, არადა ნორმალურ ხელისუფლებას ქვეყნის ეროვნული ინტერესებიდან გამომდინარე არ უნდა დაეშვა მაღალი რანგის პოლიტიკური ფიგურების ჩამოშვება რუსეთიდან. ჩვენი ქვეყნის ეროვნული ინტერესებისთვის უაღრესად საზიანო იქნებოდა ნებისმიერი მაღალი რანგის რუსი პოლიტიკოსის ჩამოსვლა, რომც არ ჰქონოდა ოკუპირებული ტერიტორიების შესახებ კანონი დარღვეული.

საზოგადოებამ საკუთარ ამოცანას მიაღწია, ამ შემთხვევაში, ოღონდ ცუდია, რომ ისეთი ხელისუფლება გვყავს, ასეთ საკითხებში საზოგადოების შიშით ვაღწევთ ამ შედეგს და თვითონ კი არ იღებენ გადაწყვეტილებას“, - აღნიშნა ბოკერიამ.

ცნობისთვის, ევროსაბჭოს მინისტრთა კომიტეტის სხდომა თბილისის ნაცვლად სტრასბურგში გაიმართება.

შეგახსენებთ, რომ საქართველოს, როგორც ევროსაბჭოს თავმჯდომარე ქვეყანას, მაისში ევროპის საბჭოს მინისტერიალისა და ორგანიზაციის წევრი ქვეყნების დელეგაციებისთვის უნდა ემასპინძლა. არსებული ინფორმაციით, რუსეთის დელეგაციას სერგეი ლავროვი წარმოადგენდა, რომელსაც თავის მხრივ, „საქართველოს ოკუპირებული ტერიტორიების შესახებ“ კანონი არაერთხელ აქვს დარღვეული. თბილისში რუსეთის დელეგაციის შესაძლო ჩამოსვლას ქართული საზოგადოების დიდი ნაწილი აპროტესტებდა, რის გამოც დღის წესრიგში ღონისძიების სტრასბურგში ჩატარების საკითხი დადგა.