ძალიან სამწუხაროა, რომ რუსეთი განაგრძობს პროვოკაციულ მოქმედებებს, ბუნებრივია, ამას თავის მიზანი გააჩნია, - ამის შესახებ საპარლამენტო უმრავლესობის ლიდერმა მამუკა მდინარაძემ ჟურნალისტებთან აძვიდან საოკუპაციო რეჟიმის მიერ გატაცებულ საქართველოს მოქალაქესთან დაკავშირებით განაცხადა.
მისივე თქმით, რუსეთი იყენებს საოკუპაციო ძალას, რათა ქართული საზოგადოება მუდმივად დაძაბულ რეჟიმში ამყოფოს.
"ეს ნიშნავს ბრძოლას ქართული სახელმწიფოს წინააღმდეგ. აქედან გამომდინარე, ჩვენ ეს უნდა დავაფიქსიროთ და ჩვენი ძალა არის სიმართლეში და ჩვენს პარტნიორებთან თანამშრომლობაში. ყველამ ამ ქვეყანაში უნდა გაიაზროს, რომ არსებობს რაღაც თემები, რომელთან დაკავშირებითაც ზედმეტი პოლიტიკური სპეკულაციები არ უნდა ვიკადროთ. არის საკითხები, რომელზეც არასწორი ინტერპრეტაცია „ქართულ ოცნებას“ არ აზიანებს, აზიანებს სახელმწიფოს. აქედან გამომდინარე, ოპოზიცია იქნება თუ ნებისმიერი სხვა, თავი უნდა შეიკავოს იმგვარი დარყმისგან, რომელიც შესაძლოა ხელისუფლებას აზიანებს, მაგრამ პირველ რიგში ქვეყანას აზიანებს,"- განაცხადა მამუკა მდინარაძემ.
ცოტა ხნის წინ, გორის მუნიციპალიტეტის ტერიტორიაზე, საოკუპაციო ხაზთან მდებარე სოფელ აძვის განაპირას, საოკუპაციო ძალების წარმომადგენლებმა, 60 წლამდე მამაკაცი დააკავეს.