ფოთის ჰოსპიტალში კისრის არეში შემავალი ჭრილობით ახალგაზრდა მამაკაცი შეიყვანეს. არსებული ინფორმაციით, მამაკაცმა დაზიანება ერთ-ერთ ტერმინალზე მიიღო, მიზეზი ჯერჯერობით უცნობია.

ექიმების ინფორმაციით, პაციენტის მდგომარეობა მძიმეა.

„პორტის სასწრაფო დახმარების მიერ მოყვანილია 39 წლის მამაკაცი. აღენიშნება შემავალი ჭრილობა კისრის არეში მარცხნივ და გულმკერდის ტრავმა. მოთავსებულია რეანიმაციულ განყოფილებაში, გადაყვანილია მართვით სუნთქვაზე, უტარდება შესაბამისი მკურნალობები. არ ვიცით, როგორ მიიღო მან ეს დაზიანებები, რადგან პაციენტთან გასაუბრება ვერ მოვასწარით, მართვით სუნთქვაზე იქნა სასწრაფოდ გადაყვანილი“, -განაცხადა ჰოსპიტალის ექიმმა გურანდა თევზაძემ.

როგორც ,,ინტერპრესნიუსს“ შსს-ში განუცხადეს, მომხდართან დაკავშირებით გამოძიება სისხლის სამართლის კოდექსის 170-ე მუხლის პირველი ნაწილით დაიწყო, რაც შრომის წესის დარღვევას გულისხმობს, რამაც ადამინის მძიმე დაზიანება გამოიწვია.