თელავის მუნიციპალიტეტის სოფელ თეთრიწყლებთან მეორე დღეა ხანძარს ებრძვიან. ამ დრომდე ვერ ხერხდება ცეცხლის ლიკვიდაცია. ხანძარსაწინააღმდეგო სამუშაოებს ძლიერი ქარი და რთული რელიეფი აფერხებს.
თელავის მუნიციპალიტეტის მერის წარმომადგენლის, თეთრიწყლების ადმინისტრაციულ ერთეულში, გიორგი ქიბიშაურის თქმით, ადგილზე მძიმე ტექნიკის მიყვანა ვერ ხერხდება და მეხანძრე-მაშველებს ფეხით მოუწიათ მისვლა.
მისივე ინფორმაციით, ძირითადად დამწვარია ტყის ქვედა საფარი და გამხმარი ხეები. ჯერჯერობით უცნობია რამ გამოიწვია ხანძარი და რა რაოდენობის ფართობია დამწვარი.