რაჭა-ლეჩხუმ-ქვემო სვანეთში სახელმწიფო რწმუნებულმა არჩილ ჯაფარიძემ COVID-19-თან დაკავშირებით, სამუშაო შეხვედრა გამართა, რომელსაც რწმუნებულის მოადგილეები და სამხარეო ადმინისტრაციაში შემავალი სამსახურების ხელმძღვანელები ესწრებოდნენ. ამის შესახებ ინფორმაციას რაჭა-ლეჩხუმ-ქვემო სვანეთში სახელმწიფო რწმუნებულის პრესსამსახური ავრცელებს.
მათივე ცნობით, შეხვედრაზე რეგიონში ამ კუთხით არსებული ვითარება და პრევენციული ზომები განიხილეს, კონკრეტული დავალებები მიიღეს, მათ შორის, საქართველოს ჯანდაცვის სამინისტროს რეკომენდაციების შესაბამისად რეგიონის მასშტაბით სკოლებისა და სკოლამდელი დაწესებულებების, ასევე საზოგადოებრივი ტრანსპორტის სადეზინფექციო სამუშაოების განხორციელების შესახებ.
მოადგილეებს დაევალათ მუნიციპალიტეტებში საკოორდინაციო შეხვედრების ჩატარების უზრუნველყოფა, სადაც არსებული სიტუაციის შესახებ ამომწურავი ინფორმაციის მიღება პერიოდულად იქნება შესაძლებელი.
ამასთან, შეხვედრაზე გაცხადდა, რომ სამთავრობო უწყებათაშორისი საკოორდინაციო საბჭოს რეკომენდაციის საფუძველზე რაჭა-ლეჩხუმ-ქვემო სვანეთის რეგიონში გაუქმდება 3 და 8 მარტს დაგეგმილი ხალხმრავალი ღონისძიებები საზოგადოებრივი თავშეყრის ადგილებში.
პრემიერ-მინისტრის ხელმძღვანელობით შექმნილი საკოორდინაციო საბჭოს ფარგლებში უკვე ამოქმედებულია საკოორდინაციო სამუშაო ჯგუფები მხარის რწმუნებულების ხელმძღვანელობით. სამუშაო ჯგუფებს კოორდინაციას რეგიონული განვითარებისა და ინფრასტრუქტურის სამინისტროს და საქართველოს პრემიერ-მინისტრის მრჩეველი რეგიონალურ საკითხებში სოზარ სუბარი უწევენ.