კორონავირუსის გავრცელების პრევენციის მიზნით, ბათუმის მუნიციპალურ საბავშვო ბაღებში სადეზინფექციო ღონისძიებები დაიწყო.

როგორც „ინტერპრესნიუსს“ ბათუმის მუნიციპალიტეტის მერიიდან აცნობეს, ასევე დაიწყო მუნიციპალური ავტობუსების სპეციალური ხსნარებით დამუშავება.

მათივე ინფორმაციით, შეხვედრა გაიმართა მიკროავტობუსების კომპანიების წარმომადგენლებთან, რომელთაც სადეზინფექციო სამუშაოებთან დაკავშირებით შესაბამისი რეკომენდაციები მიეცათ.

„პრევენციის მიზნით, გაუქმდა მუნიციპალიტეტის ორგანიზებით დაგეგმილი ხალხმრავალი ღონისძიებები. დროებით შეწყდა დელფინარიუმში წარმოდგენები. ხსნარებით იწმინდება მუნიციპალიტეტის ადმინისტრაციული შენობები“, - აღნიშნულია ბათუმის მერიის მიერ გავრცელებულ ინფორმაციაში.