საქართველო-აზერბაიჯანის ლაგოდეხის სასაზღვრო-გამშვები პუნქტიდან დღეს აზერბაიჯანის ერთ მოქალაქეს, რომელსაც მაღალი ტემპერატურა დაუფიქსირდა, საზღვრის გადმოკვეთის უფლება არ მისცეს.
გადაწყვეტილების მიზეზებზე დაავადებათა კონტროლისა და საზოგადოებრივი ჯანმრთელობის ცენტრის ლაგოდეხის სამსახურის უფროსმა ისაუბრა.
როგორც მაკა ხმალაძე ამბობს, იმ შემთხვევაში, თუ საქართველოს ტერიტორიაზე შემოვიდოდა აუცილებელი იყო საკარანტინო ზონაში გადაეყვანათ, რაზეც ქალმა უარი განაცხადა და აზერბაიჯანში დარჩენა ამჯობინა.
ბოლო რამდენიმე დღეში საქართველო-აზერბაიჯანის ლაგოდეხის სასაზღვრო-გამშვები პუნქტიდან ქვეყანაში შემოსვლაზე უარი რამდენიმე ადამიანს ეთქვა, ნაწილს მაღალი ტემპერატურის, ნაწილს კი ირანში მოგზაურობის გამო. ის მოქალაქეები, რომლებიც ვირუსის გავრცელების არეალის ქვეყნებიდან საზღვრის გადმოკვეთას შეძლებენ და მათ კორონავირუსისთვის დამახასიათებელი სიმპტომები აღმოუჩნდებათ, ლაგოდეხის საბაჟო-გამშვებ პუნქტთან სპეციალური კარავია გაშლილი, სადაც მოქალაქეები სპეციალური სამედიცინო ტრანსპორტირებამდე თავსდებიან.