აჭარის უმაღლესი საბჭოს საგაზაფხულო სესია აქციისა და ბოიკოტის ფონზე გაიხსნა. არასამთავრობო ორგანიზაცია „ალტერნატივას" წევრები საკანონმდებლო ორგანოს შენობაში შესვლას ითხოვდნენ, თუმცა დაცვის თანამშრომლებმა უფლება არ მისცეს.
ამასთან, საგანგებო განცხადება გააკეთეს აჭარის უმაღლეს საბჭოში, ფრაქცია „ერთიანი ნაციონალური მოძრაობის“ წევრებმა. ისინი ბოიკოტს უცხადებენ აჭარის უმაღლესი საბჭოს სხდომებს და მოითხოვენ, რომ აჭარაში არჩევნები პროპორციული წესით ჩატარდეს.
„ბოიკოტის რეჟიმში ვრჩებით, სხდომებზე მარტო ვტოვებთ უმრავლესობას და ჰგონიათ, რომ კომფორტში ვტოვებთ, მაგრამ პირობას ვაძლევთ, ეს დიდხანს არ გაგრძელდება, მივაღწევთ, რომ დაპირებული პროპორციული სისტემა მოვიპოვოთ“, - განაცხადა ელგუჯა ბაგრატიონმა.
პროტესტს აჭარის უმაღლესი საბჭოს თავმჯდომარე დავითა გაბაიძე გამოეხმაურა.
„წლებია „ნაციონალური მოძრაობა“ სხდომებს არ ესწრება. ეს მათი პოლიტიკური არჩევანია, მაგრამ კარგი იქნება თუ გაითავისებენ, რომ ამით აზარალებენ საკუთარი ამომრჩევლის ინტერესს და გაიხსენებენ, რაში იღებს დეპუტატი ხელფასს", - განაცხადა დავით გაბაიძემ.
ცნობისთვის, დღევანდე სხდომაზე საკანონმდებლო ორგანოს დეპუტატები აჭარის ჯანდაცვის მინისტრს ზაალ მიქელაძეს მოუსმენენ. მინისტრი დეპუტატების წინაშე გაწეული საქმიანობის ანგარიშს წარადგენს.