თეთნულდზე ჩამოწოლილი ზვავის შედეგად დაშავებული ტურისტის მდგომარეობა სტაბილურად მძიმეა. როგორც ღუდუშაურის კლინიკაში „ინტერპესნიუსს“ განუცხადეს, პაციენტს უკვე ჩაუტარდა პირველადი კვლევები და შესაძლოა, ოპერაციული ჩარევაც დასჭირდეს.
„პაციენტს აღენიშნება მოტეხილობები. ის კონტაქტურია და არ არის მართვით სუნთქვაზე, აღენიშნება ტრავმული შოკი.
პირველადმა კვლევებმა აჩვენა, რომ პაციენტს მაღალი ალბათობით დასჭირდება ნეიროქირურგიული და ტრავმატოლოგიური ოპერაციული ჩარევა.
მკურნალობის შემდგომი სტრატეგიის განსაზღვრისთვის პაციენტის კვლევები გრძელდება“, - აცხადებენ კლინიკაში.
ცნობისათვის, მესტიაში, მწვერვალ თეთნულდზე ჩამოწოლილი ზვავის შედეგად 6 ადამიანი დაიკარგა. ტურისტული ჯგუფის დაკარგული წევრები მთის კურორტების განვითარების კომპანიის მაშველებმა იპოვეს. შემთხვევის შედეგად გარდაცვლილია 3 ადამიანი. მაშველებმა მოახერხეს ზვავში მოყოლილი 3 მოქალაქის გადარჩენა. მათგან ერთის ჯანმრთელობის მდგომარეობა მძიმეა და მას ღუდუშაურის კლინიკაში მკურნალობენ.