„დემოკრატი“ სენატორი მასაჩუსეტსის შტატიდან ელიზაბეთ უორენი ამერიკის საპრეზიდენტო მარათონს გამოეთიშა - ამის შესახებ ინფორმაციას CNN ავრცელებს. აღსანიშნავია, რომ 3 მარტს, ე.წ. „სუპერ სამშაბათს“ აშშ-ის 14 შტატში ერთდროულად გამართულ „დემოკრატების“ საპრეზიდენტო პრაიმერში უორენს, ძირითადად, მე-3 და მე-4 ადგილები ერგო.
უორენს საკუთარი საარჩევნო კამპანია ვაშინგტონში კორუფციის აღმოფხვრაზე ჰქონდა ორიენტირებული. აიოვას შტატში გამართულ პრაიმერში უორენმა მესამე ადგილი აიღო, ნიუ ჰემპშირსა და ნევადაში მეოთხე ადგილი, ხოლო სამხრეთ კაროლინაში ის მეხუთე ადგილზე გავიდა.
შეგახსენებთ, „სუპერ სამშაბათის“ შემდეგ საარჩევნო მარათონი მილიარდერმა, მედიამაგნატმა და ნიუ-იორკის ყოფილმა მერმა მაიკლ ბლუმბერგმაც დატოვა.
ამერიკის 14 შტატში გამართულ „დემოკრატიული პარტიის“ საპრეზიდენტო პრაიმერში, ყოფილმა ვიცე-პრეზიდენტმა ჯო ბაიდენმა 10 შტატში გაიმარჯვა. მეორე პოზიციაზეა სენატორი ბერნი სანდერსი. პრაიმერის მომდევნო რაუნდი აშშ-ის 6 შტატში 10 მარტს გაიმართება.