ბათუმში, თურქეთის საკონსულოსთან ე.წ კანონიერი ქურდის, მინდია გორაძის (ლავასოღლი) ოჯახის წევრები აქციას მართავენ. აქციის მონაწილეები მისი თურქეთის ციხიდან საემიგრაციო სამსახურში გადაყვანას მოითხოვენ.
მათი თქმით, თურქეთის საკონსულოსთან სასამართლოს გადაწყვეტილებას ელოდებიან.
ლავასოღლის ოჯახის წევრები ამბობენ, რომ სასამართლოს გადაწყვეტილება დღეს გახდება ცნობილი და შემდეგ მიიღებენ შესაბამის ზომებს.
მათივე ინფორმაციით, მინდია გორაძე თურქეთის ციხეში შიმშილობს და მძიმე მდგომარეობაში იმყოფება.
„კომუნიკაციაზე ვერ გავდივართ. აქედან არ წავალთ, ვიდრე მიზანს არ მივაღწევთ. თურქული მხარისგან მოვითხოვთ, მოგვექცენ სამართლიანად. 28 თებერვალს დადგეს სპექტაკლი, გადაიყვანეს საემიგრაციოში და შემდეგ მოიტაცეს და უკან შეაბრუნეს. თურქეთში ის ბრალდებული არ არის და ექვემდებარება ექსტრადიციას მესამე ქვეყანაში“, - ამბობს დაკავებულის და ირინა გორაძე.