აჭარის ტელევიზიის ჟურნალისტი თეონა ბაკურიძე, რომელსაც არხის დირექტორმა გიორგი კოხრეიძემ შრომითი ხელშეკრულება შეუწყვიტა მედიასთან საუბრისას აცხადებს, რომ დირექტორი "ქართული ოცნების" მითითებით ხელმძღვანელობს და არასასურველ კადრებს დევნის.

თეონა ბაკურიძის თქმით, აჭარის ტელევიზიაში მძიმე კრიზისული სიტუაციაა და დირექტორს ახალი წამყვანის მოძებნა არ გაუჭირდება.

თეონა ბაკურიძის განცხადებით, მას არ აქვს მოლოდინი, მოკვლევის შემდეგ მთავარი საინფორმაციო გამოშვების წამყვანის პოზიციაზე დაბრუნდება.

"გადაწყვეტილება ყველასთვის მოსალოდნელი იყო. აშკარაა, რა სურს გიორგი კოხრეიძეს და რა ნაბიჯებსაც დგამს... რამდენიმე არასამთავრობო ორგანიზაცია უკვე დამიკავშირდა და შემომთავაზეს ინტერესების დაცვა. აბსოლუტურად უსამართლო და კანონდარღვევაა, რაც გიორგი კოხრეიძემ გააკეთა და რა თქმა უნდა, გავაგრძელებ ბრძოლას. ეს არის პრეცედენტი, როდესაც წამყვანს უფლებამოსილება შეუჩერეს. ჩამომაშორეს იმის გამო, რომ რაღაც მოკვლევა ჩაატარონ. ვრჩები ტელევიზიაში, რომ მათი სახე საზოგადოებას ვანახოთ. პასუხისმგებლობა აჭარის უმაღლეს საბჭოს, "ქართულ ოცნებასა" და ბიძინა ივანიშვილს ეკისრება, რომელმაც ბრძანება გასცა. დირექტორი ყველაზე ეძებს მიზეზს, იმ ადამიანებზე, რომლებიც მას არ მოსწონს. უსაფუძვლოდ გააუქმეს მაია მერკვილაძის შტატი, აბსურდის შედეგად, იძულებით წავიდა სამსახურიდან ნათია ზოიძე... არ მაქვს მოლოდინი, რომ ეს მოკვლევა ჩემი ეთერში დაბრუნებით დასრულდეს, თუმცა გასაჩივრების იმედი მაქვს. ტელევიზიაში მძიმე კრიზისია და ალბათ, არ გაუჭირდება დირექტორს ახალი წამყვანის მოძებნა. ის პირადი გადაწყვეტილებებით, გაუმჭვირვალედ ირჩევს კადრებს. ორშაბათს ახალ კადრს მოიყვანს და დასვამს ეთერში" , - განაცხადა თეონა ბაკურიძემ.