ზუგდიდში, სამხარეო ადმინისტრაციის შენობის წინ, სადაც საქართველოს პრეზიდენტს სალომე ზურაბიშვილს ელოდებიან, აქცია მიმდინარეობს. ადგილზე მოძრაობა „შეცვალეს“ წევრები იმყოფებიან და პრეზიდენტის ზუგდიდში ჩასვლას აპროტესტებენ. აქციის მონაწილეებს ხელში ლობიო, ხახვი და კარტოფილი უჭირავთ და ამბობენ, რომ ეს ყველაფერი პრეზიდენტს საჩუქრად უნდა გადასცენ.
„შეცვალეს“ წევრის დარიკო არქანიას თქმით, სალომე ზურაბიშვილმა არჩევნები სწორედ კარტოფილით მოიგო.
"აქ ჩამოსვლის არანაირი მორალური უფლება არა აქვს. ეს არის პრეზიდენტი, რომელიც აფხაზეთს უწოდებს განგრენას, ეს არის პრეზიდენტი, რომლის საარჩევნო კამპანიასაც შეეწირა ია კერზაიას სიცოცხლე. კეთილი ინებოს და წამობრძანდეს ჩვენთან ერთად საოკუპაციო ხაზთან და გააპროტესტოს რუსული ოკუპაცია", - აცხადებს დარიკო არქანია.
ადგილზე მობილიზებულია პოლიცია.
სამხარეო ადმინისტრაციაში სალომე ზურაბიშვილისა და ადგილობრივი ხელისუფლების წარმომადგენლების შეხვედრა იგეგმება.