რაჭა-ლეჩხუმისა და ქვემო სვანეთის სამხარეო ადმინისტრაციის ინფორმაციით, ამბროლაურის მუნიციპალიტეტის სოფელ კრიხის მიმდებარედ ხანძრის ქრობის პროცესში ორი ვერტმფრენი ჩაერთო, ცეცხლი ტყის ქვედა საფარს უკიდია.
როგორც უწყებიდან „ინტერპრესნიუსს“ აცნობეს, ადგილზე მობილიზებულია სახანძრო-სამაშველო სამსახურის 150 მეხანძრე-მაშველი და ცოცხალი ძალა ადგილობრივი მოსახლეობის სახით. მათივე ცნობით, ადგილზე შექმნილია სამუშაო შტაბი, რომელსაც შინაგან საქმეთა მინისტრის მოადგილე იოსებ ჭელიძე ხელმძღვანელობს.
ხანძრის ადგილზე დილიდან მხარის რწმუნებული არჩილ ჯაფარიძე, რწმუნებულის პირველი მოადგილე და ადგილობრივი თვითმართველობის წარმომადგენლები იმყოფებიან.
„ხანძარი დაახლოებით 15 ჰექტარზეა გავრცელებული. ცეცხლი ბალახს და ბუჩქნარს უკიდია. დასახლებულ პუნქტზე ხანძრის გავრცელების საფრთხე არ არსებობს. სიტუაცია კონტროლს სრულად ექვემდებარება. ხანძრის ლოკალიზებას დღის ბოლომდე შევძლებთ“, - განაცხადა არჩილ ჯაფარიძემ.