კორონავირუსის გავრცელების პრევენციის მიზნით, ქვემო ქართლის რეგიონში ხალხმრავალი სახალხო დღესასწაულები, მათ შორის ,,ნოვრუზ ბაირამი", რომელიც ტრადიციულად მარტში ერთი კვირის განმავლობაში ტარდება და 21 მარტს ფართომასშტაბიანი ღონისძიებით სრულდება, აღარ ჩატარდება. რეგიონის მასშტაბით, ადგილობრივ თვითმმართველობებში შეწყდა მოქალაქეთა მიღება. ამის თაობაზე ინფორმაციას ქვემო ქართლის სამხარეო ადმინისტრაცია ავრცელებს.

,,სამთავრობო უწყებათაშორისი საკოორდინაციო საბჭოს რეკომენდაციის მიხედვით, ქვემო ქართლში სახელმწიფო რწმუნებულისა და რეგიონის მუნიციპალიტეტების ადმინისტრაციებში, COVID-19-ის გავრცელების პრევენციის მიზნით, შეჩერდა მოქალაქეთა მიღება და გაუქმდა ხალხმრავალი ღონისძიებები, მათ შორის ,,ნოვრუზ ბაირამის" სახალხო დღესასწაული, რომელიც ტრადიციულად მიმდინარე თვის განმავლობაში აღინიშნება. მოსახლეობა საჯარო უწყებებიდან ინფორმაციის მიღებას სატელეფონო კომუნიკაციის გზით შეძლებს", - ნათქვამია ქვემო ქართლის სამხარეო ადმინისტრაციის ოფიციალურ განცხადებაში.