რუსთავის მერის ირაკლი ტაბაღუას ინივატივით, ქალაქში მოხალისეთა მობილური ჯგუფი იქმნება. მობილური ჯგუფი ეპიდემიოლოგიური მდგომარეობის გაუარესებისა და საჭიროების შემთხვევაში, თვითიზოლაციაში მყოფ პირებს დაეხმარება. ჯგუფის ჩამოყალიბების დეტალებზე იმსჯელეს, კორონავირუსის გავრცელების პრევენციის მიზნით, რუსთავის მერიაში შექმნილი სამუშაო ჯგუფის შეხვედრაზე, რომელსაც ქალაქის მერი ირაკლი ტაბაღუა, მერის მოადგილეები, სამსახურების ხელმძღვანელები, ქალაქის საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის დირექტორი ესწრებოდა.
რუსთავის საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის დირექტორის დავით ბეგაშვილის განცხადებით, მოხალისეთა მობილური ჯგუფის მუშაობის სპეციფიკა და რეჟიმი მკაცრად იქნება გაწერილი და რაც მთავარია, მათი უსაფრთხოება და ჯანმრთელობა მაქსიმალურად იქნება დაცული.
,,მიუხედავად იმისა, რომ ჩვენს ქვეყანაში ნამდვილად არ არის განსაკუთრებით საგანგაშოდ და მითუმეტეს, საპანიკოდ საქმე, სახელმწიფო აკონტროლებს სიტუაციას, ასევე ჩვენს ქალაქშიც კეთილსაიმედო მდგომარეობაა, მზად უნდა ვიყოთ სიტუაციის ნებისმიერი განვითარებისას საჭიროების შემთხვევაში, მოსახლეობას მაქსიმალურად გვერდით დავუდგეთ, ეს იქნება პრევენციული ღონისძიებები თუ კონკრეტულად გასატარებელი სიტუაციური ღონისძიებები. აქედან გამომდინარე, განისაზღვრა მოხალისეთა მობილური ჯგუფის წევრების შერჩევის კრიტერიუმები და რაოდენობა, ვინც სავარაუდო გართულების შემთხვევაში, იმედია, რომ ეს არ დაგვჭირდება, დაუდგება ჩვენს მოსახლეობას გვერდით“, - განაცხადა დავით ბეგაშვილმა.
შეხვედრაზე ასევე განისაზრვრა, რუსთავის მუნიციპალიტეტის მერიის თანამშრომელთა სამუშაო გრაფიკი. თანამშრომელთა ნაწილი დისტანციურ მუშაობაზე გადავიდა.
ამასთანავე, საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის სპეციალურ ჯგუფს, რომელიც ქალაქში სადეზინფექციო სამუშაოებს სისტემატურად აწარმოებს 5 კვალიფიცირებული სპეციალისტი დაემატება.