ჩვენ გვაქვს სახელით სხვა და არსით საბჭოთა სისტემის ინერცია და აი ამ სისტემის დაშლის დოკუმენტს ვაწერთ ხელს, - ამის შესახებ „სამოქალაქო მოძრაობის“ ლიდერმა ალეკო ელისაშვილმა უზენაესი სასამართლოს წინ სასამართლოს რეფორმის თაობაზე მემორანდუმის ხელმოწერისას განაცხადა.

ელისაშვილის განცხადებით, ეს არის ფაქტობრივად ფიცის დადება, თუ როგორი უნდა იყოს არჩევნების შემდეგ საქართველო.

„რაც თავი მახსოვს, 70 წლის განმავლობაში ყოველთვის ვუყურებდით ერთსა და იმავეს, რომ წინასაარჩევნოდ ოპოზიცია შეიკრიბებოდა და ტაქტიკურ საკითხებზე თანხმდებოდა ან ვერ თანხმდებოდა. ეს არის პირველი გამონაკლისი, რომ ჩვენ, აბსოლუტურად განსხვავებული ადამიანები, ოპოზიციური სპექტრის წარმომადგენლები, ხელს ვაწერთ, ერთგვარად ფიცს ვდებთ იმაზე თუ როგორი უნდა იყოს არჩევნების შემდეგ საქართველო და ძალიან მნიშვნელოვანია ის, რომ ჩვენ ვლაპარაკობთ თუ როგორ უნდა დავიწყოთ საბჭოთა მმართველობის სისტემის დაშლა, რადგან ამ ხნის განმავლობაში, ჩვენ გვაქვს სახელით სხვა და არსით საბჭოთა სისტემის ინერცია და აი ამ სისტემის დაშლის დოკუმენტს ვაწერთ ხელს. იმ დოკუმენტს თუ როგორი უნდა იყოს ნორმალური, 21-ე საუკუნის შესატყვისი, დემოკრატიული სახელმწიფოს წარმოსაჩენი და შესაფერისი სასამართლო სისტემა. ამდენად „სამოქალაქო მოძრაობა“ დიდი სიამაყით და სიამოვნებით ვაწერთ ხელს ამ დოკუმენტს,“- განაცხადა ალეკო ელისაშვილმა.