ათენში და მადრიდში მცხოვრებ საქართველოს ორ მოქალაქეს კორონავირუსი დაუდასტურდა. ამის შესახებ „ინტერპრესნიუსს“ საგარეო საქმეთა სამინისტროდან აცნობეს.

როგორც სამინისტროში განმარტავენ, საქართველოს საელჩო და საკონსულო ათენში მუდმივ კავშირზე არიან პაციენტთან. მას უტარდება შესაბამისი მკურნალობა და იმყოფება ექიმის მეთვალყურეობის ქვეშ.საგარეო საქმეთა სამინისტროს ინფორმაციით, კორონავირუსით დაინფიცირებული საქართველოს მოქალაქის ჯანმრთელობის მდგომარეობა დამაკმაყოფილებელია.

რაც შეეხება მადრიდში კორონავირუსით დაინფიცირებულ საქართველოს მოქალაქეს, როგორც უწყებაში განმარტავენ, ის ამავდროულად ონკოლოგიური პაციენტია. მათივე ცნობით, იგი მოთავსებულია კლინიკაში და იღებს შესაბამის მკურნალობას. როგორც უწყებაში განმარტავენ, მადრიდშივე იმყოფება მისი ოჯახის წევრი, რომელიც ამჟამად არის იზოლაციაში. „საკონსულო მუდმივ კავშირზეა ოჯახთან და კლინიკასთან“, -აცხადებენ უწყებაში.