ეკონომიკისა და მდგრადი განვითარების მინისტრის, ნათია თურნავას განცხადებით, სავაჭრო ქსელებში მარაგები საკმარისზე მეტია.
როგორც თურნავამ მთავრობის ეკონომიკური გუნდის წევრებთან ერთად გამართულ ბრიფინგზე განაცხადა, შესაბამისად, მოქალაქეების წუხილი, რომ რომელიმე პროდუქტის დეფიციტი შეიძლება გაჩნდეს, უსაფუძვლოა.
„მარაგები სავაჭრო ქსელში არის საკმარისზე მეტი. ძალიან კარგად არის ჩვენი სავაჭრო სისტემა მომზადებული ყველა გამოწვევისთვის. აქედან გამომდინარე, რაიმე საფუძველი ზოგიერთ პროდუქტზე მოხმარების გაზრდის, არ არსებობს. ჩვენ სრულიად ვმართავთ, მათ შორის ლოჯისტიკურად, მომარაგების საკითხს. ჩვენ ჩართული ვართ თითოეული მიწოდების ჯაჭვის მონიტორინგში, თითოეული პრობლემა ძალიან სწრაფად მოდის ჩვენამდე და ჩვენ ამას ვაგვარებთ. აქედან გამომდინარე, არანაირი საფრთხე შეუფერხებელი მიწოდების პროდუქტების, პირველადი მოხმარების საქონლის, არ არსებობს. ყველა მოქალაქეს მინდა მოვუწოდო, ნუ აყვებიან ირაციონალურ შიშებს. კორონავირუსი ესაა გლობალური და ახალი გამოწვევა. რასაკვირველია, ყველანი ცოტათი ვღელავთ, მაგრამ ეს არ არის საფუძველი, რომ ავყვეთ უსაფუძვლო აჟიოტაჟს და წუხილს“, - განაცხადა ნათია თურნავამ.
ამასთან, ეკონომიკის მინისტრმა სავაჭრო ქსელში დასაქმებულებს „თავდაუზოგავი შრომისთვის“ მადლობა გადაუხადა.
„მინდა მადლობა გადავუხადო თითოეულ ადამიანს, ვინც დასაქმებულია სავაჭრო ქსელებში - თითოეულ მოლარეს, კონსულტანტს, ვინც თავდაუზოგავად შრომობს, რადგან მართლა ძალიან დიდი მისია აკისრიათ მათ.
ჩვენთვის მართლა განსაკუთრებული ზრუნვის საგანია სავაჭრო სექტორი, კომპანიები, რომლებიც ათასობით ადამიანს ასაქმებენ საქართველოში“, - აღნიშნა ეკონომიკის მინისტრმა.