ვფიქრობ, ფანჯარა დიდი ხანია გამოღებულია, ვფიქრობ, საქართველო არის ევროპული საზოგადოების ღირსეული წევრი, - ასე ეხმაურება პარლამენტის პირველი ვიცე-სპიკერი გია ვოლსკი ევროსაბჭოს საპარლამენტო ასამბლეის მონიტორინგის ჯგუფის თანამომხსენებლების განცხადებას. მისივე თქმით, საქართველომ გაცილებით უფრო მეტი ნაბიჯი გადადგა ევროპული თანეგობრობისკენ, ვიდრე ამ შეფასებაშია ასახული.

"მე ვფიქრობ, რომ ამ შეთანხმებამ გარკვეული უკეთესი პერსპექტივა გაუჩინა ჩვენ ქვეყანას, რომ შეინარჩუნოს სტაბილურობა. ძალიან დიდია მობილიზება იმ ძალების, მათ შორის, არა მარტო საქართველოში, რომელიც დესტაბილიზაციაში ხედავს პერსპექტივას და პოლიტიკურ გამორჩენას. ვფიქრობ, ახლა ის დრო არ არის, რომ პოლიტიკური დაპირისპირების ხარისხი გავზარდოთ. ასე რომ, შეფასებას ვიღებ, დადებითია, კარგია, მაგრამ ამასთანავე უნდა ვთქვათ, რომ საქართველომ გაცილებით უფრო მეტი და მძლავრი ნაბიჯი გადადგა ევროპული თანეგობრობისკენ, ვიდრე ამ შეფასებაშია ასახული,"- განაცხადა გია ვოლსკიმ.

შეგახსენებთ, რომ ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლებმა განცხადება გაავრცელეს.

“პოლიტიკური შეთანხმება, რომელიც მმართველ უმრავლესობასა და ოპოზიციას შორის იქნა მიღწეული 2020 წლის საპარლამენტო არჩევნებთან დაკავშირებით, რომელსაც ჩვენ მივესალმებით, წარმოადგენს შესაძლებლობების ფანჯარას საქართველოს დემოკრატიული კონსოლიდაციისთვის, -ამის შესახებ ევროპის საბჭოს საპარლამენტო ასამბლეის საქართველოს მონიტორინგის ჯგუფის თანამომხსენებლების ტიტუს კორლატეანის და კლოდ კერნის განცხადებაშია ნათქვამი.