რუსთავის მერი ირაკლი ტაბაღუა, ქართველი ექიმებისთვის ,,მადლიერების ტაშის“ აქციას შეუერთდა. ამის შესახებ „ინტერპრესნიუსს“ რუსთავის მერიიდან აცნობეს, ზუსტად 21:00 საათზე, ქალაქის მერიის წინ, რუსთავის მერი, მერის მოადგილეები გოჩა ლორია, ბესიკ ტოგონიძე და მერიის ის თანამშრომლები შეიკრიბნენ, რომლებიც ამ დროისთვის ჯერ კიდევ სამსახურებრივ მოვალეობას ასრულებდნენ და ქალაქის მუნიციპალიტეტის შენობაში იყვნენ.

აქციაში მონაწილეობა რუსთაველმა ექიმმა შორენა მიქაძემაც მიიღო.

,,მუშაობის დისტანციური რეჟიმიდან გამომდინარე, დღეს აქ ცოტანი ვდგავართ, მაგრამ ყველა უდიდეს მადლობას ვუხდით ქართველ ექიმებს, რომლებიც ოცდაოთხსაათიან რეჟიმში მუშაობენ და ჩვენი ჯანმრთელობის სადარაჯოზე დგანან. ჩვენ ვამაყობთ მათი პროფესიონალიზმით, მათ უყვართ ჩვენი ქვეყანა, ჩვენი ხალხი, ამ დღეეში ქართველმა ექიმებმა მართლაც შეუძლებელი შეძლეს და უდიდესი მადლობა მათ ამ გმირობისთვის" , - განაცხადა რუსთავის მერმა.