ბიუჯეტური ავიაკომპანია „რაინეარი“ აცხადებს, რომ მომავალი კვირიდან ევროპაში თითქმის ყველა რეისს გააუქმებს. აღნიშნული გადაწყვეტილება კორონავირუსის კრიზისს უკავშირდება.
ეპიდემიამ განსაკუთრებით დააზარალა ავიაინდუსტრია, რადგან ვირუსის შესაჩერებლად არაერთი ქვეყნის ხელისუფლებამ საზღვრები დაკეტა და ფრენები აკრძალა.
დღეს გავრცელებულ განცხადებაში „რაინეარი“ მის მომხმარებლებს მოუწოდებს, ხელისუფლების ყველა აკრძალვას დაემორჩილონ.
კომპანიის ინფორმაციით, 18 მარტიდან 24 მარტამდე დაგეგმილი რეისების 80% გაუქმდება, ხოლო 24 მარტიდან თითქმის ყველა რეისი აიკრძალება. დარჩება მხოლოდ დიდ ბრიტანეთსა და ირლანდიას შორის აუცილებელი რეისების მცირე რაოდენობა. კომპანიაში აცხადებენ, რომ მჭიდრო კავშირზე იმყოფება ევროკავშირის ქვეყნების საგარეო უწყებებთან და საჭიროების შემთხვევაში სამაშველო რეისების განხორციელებაში მიიღებს მონაწილეობას.